Читать книгу "Первая Ливонская война, 1480–1481 годы. Документы - Марина Бессуднова"

Artikel der besch[uldunge]

Alße denn lange jor tzwisschen dem stifte Rige undt den bisschoffen des selbtigen Stiftes von eynem undt dem achtbaren Dewtsschen Orden zcu Leifflande vom andern teile große, verliehe zcwetracht, Unwillen, wehemuth undt bitterheit geweßen ist, dodurch der wirdige orde stets vorhindert wart undt ist, den unglobigen Rusßen widderzeusteende undt die undir den gehorßam der hilgen Romeschen kirchen undt cristenen geloben zcu brengen.

Item desses bisschopps nehsts vorfaren, do die nydderlage geschag mith den Litthawen, ließ eynen vogedt zcu Carchuß undt alle des ordens volck, die awßme streythe widderumme qwomen, uff der Dune toethslaen, vormerthen undt vorbrengen undt santhe in Litthawen, ließ awßgeben alle gefangene, welcherley arth undt weßens sie woren, also das do die wegesten undt mercklisten alle dirßlagen undt vortrenketh wurden.

Item wiewol der wirdige orde mith desßem bisschoffe vele vordracht machete, hot her doch der keyne willen halden noch seyne noch seyner vorfaren, sunder stets domoch bestanden, den [orden] zcu vortreiben.

Ins erste im Prewßen kreige undir guttem geloben unentßayth stormethe her das sloß Rige undt zcuschoß die voirborg, zcu vorhinderende die entsetezinge des lands Prewßen, dorobir das landt vorloren undt undir die krone zcu Polen gebrocht wart, dem orden abhendig undt nicht zcu kleynem schaden. Undt domethe nicht geßetigeth, sundir den orden zcu Leifflande ouch zcu vortreibende, santhe her in Sweden undt both in an, Haryen undt Wirlandt helffen zcu wynnende, undt doruff eynen, Schenkel genumpt, etczliche Sweden inß landt holthe, dergleichen auch in Litthawen, den wolde her Cawrlandt schicken zeur handt, uff das sie im widderhelffen sulden keen den orden.

Vorth undir guttem, cristlichem glouben undt vrede, zcu x joren vom gancze lande gemachet undt vorsegilth, boben das die Sachen zcwisschen im undt dem orden rechtlichen bryngen im hove Rome, vorbanth her sich mith des reichs rethem zcu Sweden keen den orden, telende mith in alle des ordens lande, undt santhe Hinrich vom Hoenperge, seynen uppirsten houptman, mith seynem schiffe undt dynern in Sweden, ließ volck eynholen mith aller kreighaftiger weere, weichere eynteils wyndeß halben vorßatczt wurden undt nicht eynqwomen, undt thate en eyn seyne sloße undt veste, mith aller nottorft vorsorgende.

Item zeuvorn vill undt auch nu am tage Conversionis Pauli eyn landißtag gehalden warth zcu reothßloende, wie men den Rewsßen widdersteen undt desse lande Leifflandt vor in behalten mochte fordir unbeschedigeth. Wolde her do doch nicht körnen, sunder seynes eigenen willen gebrawchen undt stach do so vill ungehortis, untrechtlichs undt unbeillichs bey, das men do nicht zcukomen konde, den Rewsßen widderstant zcu thuende.

Item die Pleßkawir haben im, so her selbist von sich schreibt, noch vorczihunge der zceith undt seynem stifte Rige abgedrungen xxvii meylen langk undt vumff meylen breeth mith landen undt lewthen undt nu kortcz hunderth undt lxxiii menschen in ere Rewssche ее getoft zcu großir swechinge der cristenheit. Das her alls nicht achtete undt nicht hot wellen keren, wiewol ym gevache hulffe gebothen is, zculieß undt vorhyngk den Rewsßen, eyne veste noch der ander im stiffte uffzcußloende, dodurch die lande gancz gekrencketh werden undt zcum latczten undir ire gewalth brengen, so men nicht mith ganczir macht do widder iß.

Item der Pleßkawir macht undt wrevelheit zcu krenkende, dirbothen sich die Nawgarter, mith dem orden zcu voreynigen, dorawß vorhoffen was groß fromen undt wolfarth der cristenheit. Undt weren mith Gots hulffe lange undir den gehorßam der heilgen Romesschen kirchen undt cristen globen gebracht, das her vorhinderte undt seyne vorfaren mith dem stiffte stes vorhindert haben.

Item solde men lengir in sulchem gedrange undt vare geßesßen haben adir noch sitczen mith dem stiffte Rige, were gancz zcu befruchtende geweßen, dy gemeyne lande Leifflandt widder undir den uncristenen globen in die hande der abgesunderthen Rewsßen gebrocht weren undt wurden. Dorumme hot der orde genotiget undt getwungen dem bisschoffe musßen entßagen undt das stiffte Rige entsayther undt kreyghsweyße anfertigen, eynnemen, gewannen undt dem bisschoffe mith grosßen reden undt rechte offinbar thuen, das her vormeynthe, vorhatte, undir guttem, veligem vrede undt cristenen globen heemlichem dem orden zcu thuende, sulde das stiffte Rige vor den Rewsßen undt andern sust bey dem cristen globen bleiben undt behalthen werden.

Undt sali men abgedrungene wasser, lande undt lewthe von den Rewsßen widder gewynnen undt die lande Leifflandt auch noch vor in behalten, muß gescheen vormittelst grosßir macht, das denn dorumme der heilge vatir pawist welle gönnen, geben, losßen undt bestetigen dem orden das stiffte Rige, das sie von rechtir noithweere mith dem swerth gewonnen haben, in der wertlicheit, alße lande, lewthe, stethe, slosße undt veste undt alle weltliche zcubehorunge, zcu gedeye undt wolfarth, vromen undt vormerunge der cristenheit. So sulchens geschiet, hoffet der wfirdige] orde zcu Gothe undt seyner wirdigen mutter, vleiß anzcukerende, undt auch also, das die Pleßkawir undt Nawgarthir undir den cristenen globen gebrocht mögen werden.

Vorgenomen wege uff das stiffte Rige

Ins erste, das der bobist dem orden zcu Leifflandt das stiffte Rige gancz welle geben undt bestetigen, nochdem sie es mith dem swerthe von noth undt gedrangs wegen haben dem erczbiss[choff] musßen abewynnen, undt die annaten vom stifte Rige werden awßgerichtet, undt das die ercze werde gelegt in der kirchen eyne Revall adir Cawrlandt, undt men im stiffte Rige hette eynen weygelbisschoff, der seyn leger hette zcu Woldemer, undt das die stadt Rige in allen werde gegeben undt bleibe bey dem orden alße bey erem rechten, natürlichen hem in allen weltlichen herlicheithen mith den regalien, undt das der erczebisschoff, wor der gesatczt wurde, geleichewol behalde das geistliche recht.

Der andir wegk, das der bobist dem orden welle geben das wertliche recht im ganczen stiffte Rige undt confirmire in lande, lewthe, slosße, veste, stete, weigbilde etc., alse sie die nu in weeren haben undt von in gewonnen seyn, bey dem orden ewig zcu bleibende, undt das eyn erczbisschoff zcu Rige behalde das geistliche recht undt bynnen Rige seynen hoff undt das sloß Dalen, das bißher zcu probisteyen gehört hot, undt die gepiete Ixkull undt Lennewerden, undt sich fordir mith den andern slosßen undt eynwonern des stifftes noch mith der stadt Rige nicht bekümmere noch zcu rathende habe, sundir von der stadt Rige sowol alße vom stiffte in allen wertlichen gerechticheithen undt herlicheithen unvorworren sey.

Der dritte, das der bobist dem orden bestetige das sitffte Rige in allen wertlichen herlicheiten undt gerechticheiten mith allen lewthen, slosßen, steten, vesten, zcubehoringen, alse sie das nu in weeren undt gewonnen haben, undt das men vorwerbe, so eyn erczbisschoff vorstorbe, das denn das capittell eynen kyeße noch rothe undt willen des meisters undt Ordens, der in undt den landen gefellig sey, undt das den selbtigen der pabist bestetige, undt das der eynhabe das sloß Dalen, das bißher zcur probisteye hot gehört, undt den hoff bynnen Rige undt die ampte Ixkull undt Lennewerden, undt sich fordir noch in der stadt Rige noch im stiffte nicht bekümmere, alleyne mith der geistlichen gerechticheit undt der vorgenumpten ampte gebrawche, undt das men die annaten awßrichte vom ganczen lande sowol vom stiffte alße capittell Rige.